O sindicato UGT trasladou ao Porto de Vigo a súa preocupación pola situación dos terreos onde se asenta Estaleiros San Enrique, a antiga Vulcano, e pediu que se manteña o seu uso industrial.

Así, o sindicato mantén que eses terreos portuarios, dos que fai uso o estaleiro en réxime de concesión, deben permitir a continuidade da produción industrial, e non destinarse a espazo de almacenamento de colectores.

“Desde UGT consideramos imprescidible que se achegue seguridade e certidumbre para poder reflotar unhas instalacións que levaban moitos anos paradas e sen investimentos”, sinalaron nun comunicado.

No entanto, recoñecen que os responsables de San Enrique “teñen a obrigación de cumprir os compromisos adquiridos no proceso de adjudicaicón da concesión portuaria, e os prazos establecidos.

UGT sinalou que seguirá “de preto” este proceso, reclamando ao estaleiro que cumpra as esixencias establecidas na concesión, e mantendo reunións períodicas co presidente do Porto, Carlos Botana, para facer un seguimento da situación.