O grupo municipal do PP en Vigo denunciou este luns a “opacidade” do goberno de Abel Caballero por “denegar o acceso” ao estudo encargado para deseñar as bases do futuro servizo de bus urbano, e ao expediente aberto para revisar a tarifa de Vitrasa (actual concesionaria) para o ano 2025.

O portavoz ‘popular’, Miguel Martín, lamentou que o goberno municipal é “reincidente” na súa negativa a facilitar información, e lembrou que, hai un ano, tampouco permitiu o acceso ao expediente de reequilibrio económico da concesión de bus.

Segundo apuntou, o goberno local xa dispón do estudo sobre o bus urbano e, aínda que o PP pediu os datos hai días, obtivo unha negativa como resposta. Igualmente, denunciou que tampouco se permitiu coñecer a proposta de revisión de tarifas do bus urbano para o ano que vén, a pesar de que a empresa trasladou ao Concello os seus cálculas “fai máis dun mes”.

“Non nos queda outra que denunciar publicamente a reincidencia deste alcalde cando toca ser transparente co transporte público de Vigo. Un servizo que leva anos empeorando mentres el mantense como un mero observador“, resumiu Martín.

Tras insistir en que Vitrasa fai menos expedicións, reiterou que o alcalde actúa con “pasividade cómplice” fronte á deterioración do servizo, e reclamou que o novo estudo de mobilidade sirva para dar un “xiro de 180 graos” ao transporte público vigués.