A Universidade de Vigo (UVigo) traballa na posta en marcha de 11 novas titulacións para os dous próximos cursos (2025/2026 e 2026/2026) no seu tres campus, quedando aínda “numerosos trámites”.

Segundo recolle o Diario da Universidade de Vigo (DUVI), trátase dun novo grao, tres dobres titulacións e sete máster que serán as “grandes novidades” da oferta académica da institución para os devanditos cursos, podendo estrearse dúas dobres titulacións vinculadas á Facultade de Ciencias o ano que vén.

Así se anunciou tras o consello de goberno da UVigo levado a cabo este luns, onde se aprobou a verificación destas titulacións, así como unha normativa que dá máis estabilidade ao profesorado substituto, entre outras cousas.

En concreto, no campus de Pontevedra porase en marcha no curso 2026/2027 o grao de Enxeñaría de Tecnoloxías Navais para a Defensa, que estará adscrito ao Centro Universitario da Defensa de Marín e que substituirá ao actual grao de Enxeñaría Mecánica.

Doutra banda, a UVigo destaca a posta en marcha do que será o primeiro PCEO -Programa Conxunto en Estudos Oficiais-, ‘dobre titulación’, do campus, e que, neste caso, unirá as titulacións de Comunicación Audiovisual e Publicidade, impartido en Facultade de Comunicación.

Ademais, tamén se porá en marcha un novo máster, vinculado neste caso á Escola Técnica Superior de Enxeñeiros de Montes, denominado Máster en Solucións Innovadoras en Geomática.

No campus de Ourense a novidade serán dous novos PCEO, neste caso ambos os vinculados á Facultade de Ciencias: PCEO en Enxeñaría Agrícola e Ciencias Ambientais e PCEO en Enxeñaría Agrícola e Ciencia e Tecnoloxía dos Alimentos. A idea é que estean dispoñibles xa o curso que vén.

En canto á oferta de máster, aprobouse a verificación de tres novos en Viticultura e Enoloxía; en Políticas de Seguridade e Sistema Penal e en Traballo Social no ámbito da saúde.

Así mesmo, no campus de Vigo tamén se porán en marcha tres máster en Ciencia e Tecnoloxía en Nanomateriais e Biomedicina; o máster en Deseño e Fabricación na Industria Conectada e Intelixente e o máster en Vehículos Autónomos.

Noutra orde de cousas, o consello de goberno da UVigo deu luz verde a varias cuestións, como a aprobación dunha nova normativa para dar máis estabilidade ao profesorado substituto. Tamén se aprobou unha modificación da normativa reguladora dos concursos de acceso aos corpos docentes universitarios, equiparando o galego ao español, “pondo as dúas linguas ao mesmo nivel”.