O alcalde de Vigo, Abel Caballero, celebrou este luns o éxito do acto de aceso da iluminación do Nadal, que tivo lugar na tarde do sábado, e recalcou que, durante todo o fin de semana, o nivel de ocupación hoteleira na cidade superou o 72 %.

En declaracións remitidas aos medios, o rexedor olívico apuntou que o acto do aceso, no que participaron miles de persoas (o recinto acoutado en Porta do Sol tiña un aforamento de 7.000 persoas), desenvolveuse sen incidentes.

“Funcionou moi ben o dispositivo de seguridade, e non houbo ningunha afección ao tráfico”, valorou Caballero, que subliñou que, esa xornada, a ocupación hoteleira en Vigo superou o 82 %, mentres que, durante todo o fin de semana, foi do 72,5 %.

O acto de aceso deu especial protagonismo á solidariedade cos afectados pola DANA en Valencia, cunha mensaxe na árbore luminosa de Porta do Sol e co himno da Comunidade Valenciana.

Precisamente, Caballero confirmou que, nas próximas horas, unha decena de axentes da Policía Local sairá para Paiporta para seguir colaborando nas tarefas de limpeza e reconstrución. Así, tras a presenza dos bombeiros hai uns días, agora un inspector e 9 axentes de Policía Local desprazaranse a Paiporta, a petición deste concello, cun furgón e un coche patrulla, ademais de todo o seu equipamento para colaborar.