O goberno municipal de Vigo concedeu ao CSIC a licenza para iniciar a derriba dos edificios da antiga ETEA (Escola de Transmisións e Electrónica da Armada) onde se construirá a nova sede do Instituto de Investigacións Mariñas (IIM), que actualmente está en Bouzas.

En declaracións remitidas aos medios, o alcalde, Abel Caballero, matizou que o permiso de derriba afecta a edificios que non hai que conservar. “Unha parte moi importante das construcións ten que ser conservada e mantida, pero o que facemos é permitir a derriba dunhas edificacións que non teñen ningún valor”, explicou o rexedor.

Caballero lembrou que as novas instalacións do CSIC en Vigo custarán 40 millóns e que o novo edificio que se construirá tras a demolición na ETEA ten un custo estimado de 17 millóns de euros.