A delegada territorial da Xunta en Vigo e presidenta do Consorcio Casco Vello (CCVV), Ana Ortiz, anunciou este xoves a adquisición doutro edificio por parte deste organismo –participado nun 90 % pola Xunta e nun 10 % polo Concello– na zona do Berbés.

O Consorcio aprobou a compra do inmoble situado no número 27 de Ribeira de Berbés (tamén con saída á rúa Pobladores) por algo máis de 324.000 euros. Trátase dunha casa composta por planta baixa e tres alturas, cunha superficie construída de 209,94 metros cadrados e cun patio na parte posterior que conta cun pozo de auga potable.

A rehabilitación permitirá construír novas vivendas no barrio do Berbés, onde o CCVV xa adquiriu outro dez edificios para crear 6 vivendas. “Estamos a cumprir unha das prioridades da Xunta, que é facilitar o acceso á vivenda aos vigueses”, sinalou Ana Ortiz.

En xullo pasado adxudicouse a reforma do número 39 de Ribeira do Berbés e outro catro edificios foron cedidos no seu momento á UVigo para a creación da súa sede urbana, e tamén se destinou outro inmoble á construción, por parte da Xunta, do Albergue de Peregrinos Juan Manuel López Chaves. O Consorcio adquiriu tamén o edificio situado no número 7, pendente de rehabilitación.