O PSdeG criticou este mércores o “sobrecusto de case 500 millóns de euros” do hospital Álvaro Cunqueiro de Vigo e urxiu á Xunta que reconsidere a súa xestión e financiamento.
Nun comunicado, os socialistas pronunciáronse sobre o “demoledor” Informe de Fiscalización do Contrato de Concesión do Hospital Álvaro Cunqueiro de Vigo publicado polo Consello de Contas de Galicia, que conclúe que sería máis eficiente licitar a obra e os servizos do centro por separado, e non conxuntamente como levou a cabo a Xunta, xa que suporía un aforro de máis de 470 millóns de euros (IVE incluído).
Ante isto, os socialistas lembraron que o hospital foi inicialmente promovido polo goberno de Emilio Pérez Touriño, sufrindo un “cambio drástico” no seu proxecto baixo a administración de Alberto Núñez Feijóo.
“Estes cambios non só reduciron o tamaño do proxecto orixinal, senón que tamén optaron por un modelo de financiamento privado en lugar de público”, lamentaron, engadindo que o resultado foi “un sobrecusto de case 500 millóns” que os galegos “pagan debido á mala xestión de Feijóo e Rueda”.
Para o portavoz da Executiva do PSdeG, Julio Torrado, en lugar de financiar o hospital con fondos públicos, recorreuse a fondos privados que funcionan como prestamistas, incrementando “significativamente” a carga financeira sobre a cidadanía.
“É importante destacar que os socialistas propuxemos en repetidas ocasións a conversión do Hospital nunha entidade completamente pública. Estas propostas, presentadas con datos concretos no Parlamento de Galicia, foron sempre rexeitadas polo PP, que nos acusou de alarmistas e mentireiros”, destacaron.
Por iso, agora o PSdeG pregunta ao presidente da Xunta, Alfonso Rueda, se son mentireiros os membros do Consello de Contas e se desexa realmente que o hospital sexa público.
“Este informe non só valida as nosas denuncias, senón que tamén subliña a necesidade urxente de reconsiderar a xestión e o financiamento do Hospital Álvaro Cunqueiro para garantir que os recursos públicos sexan utilizados de maneira eficiente e en beneficio de todos os galegos“, sentenciou o PSdeG.
