O Consello da Xunta autorizou este luns a contratación das obras para a construción de 38 novas vivendas de promoción pública no barrio vigués de San Paio de Navia, que suporán un investimento de 8,2 millóns de euros.

Tal como informou o Goberno galego, trátase do sexto grupo de vivendas que se licita en Navia. O cinco primeiros grupos xa licitados suman 163 pisos, aos que agora se lle suman 38. Esta nova contratación permitirá a construción dun edificio de nova planta con 38 vivendas protexidas, así como os seus respectivos 38 trasteiros e 70 prazas de garaxe. O inmoble terá catro plantas e tres sotos.

En concreto, das 38 vivendas, 20 serán de tres dormitorios e 18 de dúas habitacións. Terán unha superficie de entre 72 e 79 metros cadrados estas últimas, mentres que as máis grandes, uns 90 metros. Haberá dúas vivendas adaptases a persoas con mobilidade reducida, que estarán no ático e disporán de tres dormitorios e unha superficie de 101 metros. A Consellería de Vivenda e Planificación de Infraestruturas prevé licitar as obras de inmediato, co obxectivo de que estean terminadas en 2026, segundo indica a Xunta.

O Goberno galego lembrou que empezará leste mesmo ano a construción das primeiras vivendas de promoción pública da ampliación de Navia, que en total contará con ata 1.600 pisos protexidos novos, entre promoción pública e privada.