Unha muller foi rescatada do interior dun pozo situado nunha nave abandonada de Vigo, do que tivo que ser sacada polos efectivos de emerxencia.

O operativo activouse ás 14,30 horas deste martes nunha nave da rúa Jacinto Benavente, á altura do número 59, segundo informou o CIAE 112 Galicia.

Os bombeiros de Vigo desprazáronse ao lugar e comprobaron que a muller podía respirar grazas a que a auga acumulada no pozo só lle cubría ata o pescozo.

A estreiteza do pozo obrigou aos efectivos de emerxencia a levar a cabo unha escavación para chegar á muller e sacala á superficie.

Unha vez alí, foi atendida polos profesionais de Urxencias Sanitarias 061 debido ás contusións que presentaba.