O sindicato CIG denunciou este martes que a dirección de Constellium Automotive, auxiliar de automoción con sede no Porriño (Pontevedra), está “a vulnerar o dereito á folga” ao contratar a persoal externo para completar as quendas dos empregados que están a participar no paro indefinido (que comezou o pasado 1 de abril).

Segundo apuntou, o comité xa detectou polo menos 6 casos de persoal de ETT, e xa o puxo en coñecemento da Inspección de Traballo, que este martes se trasladou ás instalacións do polígono da Granxa, “e constatou esta práctica ilegal”.

A CIG sinalou que, dado o “elevado seguimento” da folga, a empresa tivo inicialmente que unificar as tres quendas nunha soa, e recentemente ampliou a actividade a dúas quendas mediante a incorporación de persoal eventual.

“A dirección da compañía opta por este tipo de estratexias en lugar de tentar un achegamento coa representación duns traballadores que acordaron iniciar folga indefinida para rexeitar a imposición dos altos ritmos de traballo e o despedimento represivo dun compañeiro”, lamentou a CIG.

O sindicato explicou que a folga se convocou despois de que a empresa decidise romper as negociacións para determinar os tempos de produción e comunicase o despedimento dun empregado “con intención de amedrentar” ao persoal.