Grupos de investigación da Facultade de Ciencias e da Facultade de Ciencias Empresariais e Turismo do campus de Ourense da Universidade de Vigo (UVigo) desenvolveron un proxecto multidisciplinar no que, desde os seus respectivos ámbitos de coñecemento, propuxeron estratexias para a xestión sustentable de residuos vitivinícolas.

Segundo recolle o Diario da Universidade de Vigo (DUVI), a iniciativa estivo financiada pola convocatoria de axudas Inou, realizada pola UVigo co apoio da Deputación de Ourense.

Da Facultade de Ciencias participaron os grupos de investigación Planta, Chan e Aproveitamento de Subproductos e Enxeñaría Química, co investigador Pedro Miguel Ferreira Santos ao frent, e da Facultade de Ciencias Empresariais e Turismo membros do Departamento de Organización de Empresas e Mercadotecnia, con Francisco Javier Sánchez Sellero á cabeza.

“No escenario actual de recursos limitados, millóns de toneladas de residuos e subproductos alimentarios son descartados a nivel mundial pola industria agroalimentaria”, lamentaron os responsables desta iniciativa, indicando que isto supón un “problema ambiental”, ademais de danos económicos e materiais. En concreto, no sector vitivinícola, a elaboración do viño xera grandes cantidades de residuos, queimándose xeralmente un 40% do total, co que isto implica.

Por todo iso, o estudo propón alternativas sustentables para o aproveitamento e a valorización destes desperdicios. As alternativas propostas implican o uso de tecnoloxías innovadoras para separar de forma eficiente os compostos, como a celulosa e outros elementos.

No proxecto tamén se realizou unha avaliación do impacto socioeconómico da revalorización destes desperdicios na provincia de Ourense, propondo a creación dun centro de tratamento para a separación dos mesmos que, ao seu xuízo, xeraría valor para as empresas vitivinícolas e facilitaría o acceso á biomasa como combustible, evitando queimas individualizadas e a contaminación que xeran.