Un motorista resultou ferido grave en Vigo tras producirse un accidente no que tamén se viu involucrada unha furgoneta. Tal como informou a Policía Local, os feitos ocorreron sobre as 19.20 horas na intersección da Avenida de Castrelos con Ramiro Pascual, na parroquia de Matamá. Alí, unha moto impactaría contra unha furgoneta, resultando ferido grave o condutor do vehículo de dúas rodas, que foi trasladado ao Hospital Álvaro Cunqueiro.

Minutos despois, sobre as 20.50 horas, tamén en Vigo produciuse unha saída de vía dun turismo, quedando envorcado con dous ocupantes atrapados no seu interior, que foron liberados e trasladados a un centro hospitalario. Ademais, unha muller de 74 anos de idade resultou gravemente ferida na cidade olívica ese mesmo venres despois de ser atropelada no garaxe comunitario dun edificio situado na rúa Montecelo Alto.

Foi un condutor octoxenario o que, por un descoido co seu coche automático, atropelou á anciá, sendo trasladada a un centro hospitalario, con prognóstico grave.