O alcalde de Vigo, Abel Caballero, criticou este luns de novo a “falta de peso político” de Alfonso Rueda que, ante o “ataque” de Isabel Díaz Ayuso á conexión por AVE entre Lisboa, O Porto e Vigo, queda “calado”.

Segundo trasladou o rexedor olívico nunhas declaracións gravadas e remitidas aos medios, a dereita de Madrid e de Lisboa “se alían” para que a conexión por AVE entre España e Portugal “vaia en contra de Vigo e se priorice a conexión entre Madrid e Lisboa”, en contra do “acordo entre Pedro Sánchez e Antonio Costa”.

“Ante este ataque a Vigo”, subliñou Abel Caballero, “vese a absoluta falta de peso político de Rueda”, que “queda calado” mentres Isabel Díaz Ayuso fala de priorizar o AVE Lisboa-Madrid. “Rueda queda calado. Non defende a Vigo nin a Galicia”, criticou o alcalde.