O alcalde de Vigo, Abel Caballero, anunciou este martes que o ascensor Halo entrará en funcionamento na primeira quincena de febreiro. Nun audio gravado e enviado aos medios de comunicación, Caballero indicou que as obras desta infraestrutura “están a piques de acabar”, polo que poderá abrirse “na primeira quincena de febreiro”.

El volveu a subliñar a importancia deste ascensor, que unirá “ducias e ducias de miles de persoas da cidade”, segundo dixo, sendo unha obra cun “estilo arquitectónico único”. Todo iso tras preto de ano e medio de obra e un investimento que superou os 15,7 millóns de euros, a pesar de que inicialmente se calculou en menos de 13 millóns.