O goberno municipal de Vigo denunciou este martes que CIG e BNG están “a boicotear” o tráfico na cidade, “castigando” aos traballadores e aos cidadáns coas protestas polo convenio de Vitrasa, e insiste en atribuír a estas dúas organizacións en exclusiva o conflito na concesionaria do bus urbano, a pesar de que as protestas e a folga indefinida son convocadas por un comité do que forman parte 4 sindicatos, CIG, CC.OO., UXT e USO (e ningún desmarcouse das medidas, senón todo o contrario).
Nun audio gravado e remitido aos medios, o portavoz do goberno vigués, Carlos López Font, insistiu en que “o BNG e a CIG están a facer un dano inmenso á cidade de Vigo”, en referencia ás protestas destes días que causaron retencións na circulación de varios viarios á primeira hora da mañá.
“O que fan parando o tráfico e obstaculizando as comunicacións na cidade non ten nome”, proclamou o edil socialista, quen recalcou que, nesas manifestacións, “son escasamente 30 persoas da CIG” as que “paralizan o tráfico varias horas”.
Así, López Font recalcou que estas “30 persoas” están “a castigar aos cidadáns que usan o transporte público e que depende del”, e que tamén castigan aos “traballadores”. “Eses 30 manifestantes da CIG si que cobran os seus salarios todos os meses, os seus compañeiros non”, engadiu.
Para o portavoz do goberno de Vigo o BNG “vai ter moi difícil que alguén lles vote” e sinalou que os nacionalistas “terán que pedir perdón” aos vigueses, e especialmente aos traballadores, por estas “protestas tan agresivas, que atentan contra a vida diaria da cidade”.
Finalmente, o concelleiro proclamou que “o goberno municipal defende aos traballadores, non á CIG” e sinalou que a central nacionalista “debería estar a negociar” para lograr un acordo e pór fin ao conflito, xa que esa “é a obrigación dun sindicato”.
CRÍTICAS Ao GOBERNO
Tras as manifestacións de Font, o concelleiro do PP, Miguel Martín, pediu ao goberno local que deixe de actuar “como portavoz” da empresa concesionaria e instou ao alcalde, Abel Caballero, ha exercer as súas competencias no tráfico local, en lugar de “culpar ao persoal” de Vitrasa do “caos circulatorio”.
Respecto diso, lembrou que o goberno coñece de antemán o itinerario das manifestacións e pode informar os cidadáns sobre posibles problemas e rutas alternativas.
Por outra banda, subliñou que o persoal está a exercer o seu dereito á folga e á manifestación. “Ou seica o que quere dicir o goberno municipal é que os trabahadores non poden exercer libremente o seu dereito á protesta?”, cuestionou o concelleiro do PP, que insistiu en que o goberno local permitiu a “degradación” do servizo de bus urbano e é “incapaz” de solucionar un conflito nunha concesionaria municipal.
O portavoz do grupo municipal do BNG, Xabier Pérez Igrexas, publicou unha mensaxe na rede social X (antes Twitter) na que se refire a as manifestacións do portavoz do gobiernovigués como unha “buFONTada”. “Se non sae deputado no Parlamento galego, ten ben gañado un ‘puestito’ a nómina de Vitrasa”, afirma nesa mensaxe.
NOVA REUNIÓN
Por outra banda, a empresa concesionaria comunicou que convocou novamente a unha reunión aos representantes dos traballadores, tras o encontro errado do pasado xoves. A próxima reunión terá lugar este xoves, 11 de xaneiro.
Vitrasa recordou que, coa desta semana, serán xa cinco reunións celebradas “a instancias da empresa” para poder chegar a un acordo entre as partes. “Para iso é primordial facelo nun clima de normalidade, e no que é fundamental desconvocar a folga indefinida canto antes”, reiterou a concesionaria.
Vitrasa mantén que a súa situación é “complicada” e que, coa oferta que trasladou ao comité, os traballadores “seguen contando co mellor convenio da provincia de Pontevedra”. Por iso pediron que “reconsideren” as propostas que lles trasladaron “e que finalice canto antes unha folga indefinida que está a prexudicar á cidadanía (…) e aos propios compañeiros, envolvidos nunha folga que tan só foi votada porel 29 % do persoal”, incidiu Vitrasa.
