A Fiscalía pide 3 anos de prisión para un home acusado de ter agredido sexualmente a unha traballadora dun bar de Vigo, e que será xulgado este martes, na sala do Penal 1 da cidade olívica. Segundo recóllese no escrito de acusación pública, os feitos ocorreron en marzo pasado, cando o acusado entrou no bar que rexentaba a vítima e, “con ánimo libidinoso”, achegouse a ela e díxolle en varias ocasións “ti es miña”.

A muller saíu de detrás da barra e díxolle que ía pechar o bar. Nese momento, o acusado aproveitou para achegarse máis a ela e tocarlle o pescozo, os brazos e as costas. Cando a vítima conseguiu botalo do local, o acusado esperou fóra e, cando a muller saíu, volveu dirixirse a ela e a dicirlle “ti es miña”. O home aproximouse por detrás, tocoulle as costas e púxolle as mans sobre o peito, conseguindo tirala ao chan. Mentres a muller estaba no chan e, a pesar da súa resistencia, o acusado conseguiu tocarlle por encima da roupa os peitos, os xenitais e outras zonas do corpo. Esta situación prolongouse ata que a muller, que estaba a lle dar patadas entre as pernas, logrou desfacerse del e fuxir.

Como consecuencia do sucedido a vítima tivo que ser atendida nun centro médico, porque presentaba dor nas costelas, nunha man, eritema e un hematoma superficial nun peito. A Fiscalía pide para o acusado a pena de 3 anos de prisión por un delito de agresión sexual, e reclama que se lle prohiba comunicarse ou achegarse a menos de 500 metros da vítima por un período de 4 anos. En concepto de responsabilidade civil, pide que indemnice á muller en 300 euros.