Traballadores de Vitrasa, a concesionaria do transporte público do Concello de Vigo, convocaron unha folga indefinida a partir do 25 de novembro co obxectivo de forzar á empresa a que negocie un novo convenio colectivo.

Tal como informou nun comunicado a CIG, que preside o comité, o cadro de persoal decidiu de forma maioritaria levar a cabo esta medida “ante a negativa da compañía a negociar o convenio colectivo e despois de que 13 traballadores fosen sancionados con 60 días de suspensión de emprego e soldo no marco dos paros parciais que se están desenvolvendo”.

A organización explicou que esta decisión se optou tras unha consulta realizada polo comité aos empregados, que rexistro unha “alta participación”, con máis de 200 persoas que dixeron si á folga, fronte a 30 que se mostraron partidarias de suspender as protestas. Por outra banda, o comité enviou un requirimento ao Concello para que proceda á rectificación do decreto de servizos mínimos, despois da sentenza do Tribunal Superior de Xustiza de Galicia (TSXG), que insta a corrixir a operativa por vulneración do dereito a folga.

O comité criticou que tanto a dirección de Vitrasa como o Concello “están a impedir unha posible solución ao conflito”, debido a que a concesionaria se nega a negociar e o goberno local “culpa aos traballadores que unicamente defenden os seus lexítimos dereitos”.