O Tribunal Superior de Xustiza de Galicia (TSXG) ditou sentenza na que estima un recurso de apelación interposto polo comité de empresa de Vitrasa, concesionaria do bus urbano de Vigo, e anula as resolucións municipais sobre como afectan os servizos mínimos declarados polos paros parciais aos buses que se atopan circulando no momento de iniciarse devanditos paros. O sindicato CIG, que preside o comité de Vitrasa, valorou a decisión do TSXG como “un novo revés para o goberno local, por infrinxir o dereito á folga” no marco deste conflito.

O comité de Vitrasa, que mantén un conflito coa empresa desde hai máis de dous anos no marco da negociación do convenio, convocou paros parciais (dunha hora ao principio e de hora e media posteriormente) os luns, mércores e venres. Cando o Concello estableceu os servizos mínimos, determinouse que, no momento en que comezaban os paros, os buses que estaban a circular debían continuar o traxecto ata o final da liña, collendo e deixando viaxeiros.

A representación dos traballadores recorreu ese punto e un xulgado do Contencioso Administrativo de Vigo estimou parcialmente as súas pretensións, e estableceu unha alternativa intermedia: ao iniciarse os paros, os buses debían seguir recollendo e deixando pasaxeiros durante a seguinte media hora.

O comité interpuxo recurso de apelación e agora o TSXG deulle a razón, anulando a sentenza de primeira instancia e tamén as resolucións municipais, no que respecta a esa medida que afecta os buses que se atopen en plena ruta no momento dos paros. O alto tribunal galego expón na súa resolución que non comparte a solución que deu o Concello e sinala que os paros convocados son parciais, cunha duración “ponderada, razoable, limitada e precisa”, deixando determinado o “punto de equilibrio entre o dereito dos traballadores a exercer a folga e o dos veciños a servirse do transporte urbano”.