A CIG comprométese a informar o goberno local de Cangas sobre eventuais “incidencias” e “déficit de persoal” que ocorra no punto de atención continuada (PAC) que atende tanto a este municipio como ao limítrofe de Moaña, máis aínda tendo en conta o aumento da poboación durante o verán.

Así o avanzaron nunha rolda de prensa a secretaria comarcal de CIG-Saúde, Pilar Rodríguez, o delegado de Persoal e Prevención 061 de Cangas, Óscar Graña, tras manter un encontro coa alcaldesa, Araceli Gestido, quen recoñeceu que esta información servirá para que o Concello poida dirixirse ao Servizo Galego de Saúde (Sergas) e que “cumpran” coa prestación sanitaria.

“(Os gobernos municipais) estamos implicados nesta situación. Ao final, a primeira porta á que chaman os cidadáns é o Concello, aínda que non teñas nin as competencias nin os medios“, explicou a rexedora.

A secretaria comarcal de CIG-Saúde detallou nesta comparecencia que, antes da pandemia, o Sergas dotaba á zona dun equipo de médico e enfermeira máis para poder dar resposta ao aumento da poboación a atender durante a época estival.

Con todo, engadiu o delegado do 061, agora mesmo e “de forma continuada” está a ocorrer que a PAC de Cangas conta con “só dúas médicas, e en ocasións unha soa”, cando debería haber “como mínimo tres”.

De feito, Graña advertiu que, no caso de que soamente haxa unha facultativa e teña que saír a un domicilio, o propio punto de atención continuada “queda abandonado” nunha época na que o municipio “triplica” a súa poboación, de 25.000 a uns 75.000 veciños.

Neste contexto, Pilar Rodríguez alcanzou “o compromiso de dar datos ao Concello de cando xurdan estas incidencias de que o persoal sanitario é inferior á dotación que debería haber na PAC”. “Pedimos á Alcaldía que esixa á Xerencia da área Sanitaria (de Vigo) que garanta ese tres médicas traballando sempre”, engadiu Óscar Graña.

AMBULANCIAS E FESTAS DO CRISTO

A maiores, o delegado de Persoal e Prevención do 061 en Cangas afirmou que os tempos medios de espera 15 minutos desde que se pide unha ambulancia non se están cumprindo, porque a “situación diaria” é que teña que acudir un vehículo “desde Vigo” ou “outros lugares, co risco que isto supón”.

Por iso, Graña solicitou ao Concello a colaboración da Policía Local e de Protección Civil para que, “dentro das súas posibilidades”, cando detecten que unha ambulancia da 061 “tarde máis de 15 minutos”, fagan “un informe con datos propios” ante “a negativa” da Fundación Pública Urxencias Sanitarias a facilitalos, segundo denunciou.

Xunto con isto, a reunión serviu para abordar a atención sanitaria durante as Festas do Cristo, que arrincan este venres, 25 de agosto. A alcaldesa confirmou a contratación por parte da administración municipal –a través de Protección Civil– dunha ambulancia para as celebracións, tal e como ordena a normativa.

Desde a CIG pedíronlle que, para esta contratación, téñase en conta “o criterio técnico do persoal” e que “como mínimo” a ambulancia sexa de soporte vital básico e teña abordo dous profesionais sanitarios, é dicir, que “en ningún caso teña só un condutor”, algo que –segundo denunciou Graña– o propio 061 “non” cumpre.

O obxectivo é que esta ambulancia, ben dotada, “poida prestar servizo a calquera situación das Festas do Cristo” e así non ter que botar man da do propio 061, que está para atender cuestións alleas ao evento, tal e como explicaron os responsables sindicais e a alcaldesa.