As entradas para o concerto de Ana Mena en Vigo sairán á venda este mércores, segundo anunciou o alcalde, Abel Caballero, nun audio difundido aos medios de comunicación. En concreto, estes pases, que se venden a 10 euros, permiten aos interesados acceder á platea do auditorio de Castrelos, mentres que todos aqueles que vexan o espectáculo nas bancadas poderán facelo de forma gratuíta.

Como vén sendo habitual, venderanse 2.500 entradas na quenda de mañá (09,30 horas) e outras tantas na quenda de tarde (16,30 horas). Delas, 1.250 ofreceranse de forma presencial en cada quenda no despacho de billetes do auditorio do Concello e a mesma cantidade na web.

Caballero puxo en valor á artista malagueña, que este ano está a percorrer España coa súa Bellodrama Tour. O rexedor destacou o nivel da artista, que colaborou con cantantes da talla de Belinda, Abraham Mateo ou Becky G e dispón de ata 44 discos de platino e catro de ouro. Ana Mena actuará o vindeiro martes, día 15 de agosto, en Castrelos, nun concerto enmarcado nas Festas de Vigo, que organiza o Concello.