O Hospital Vithas Vigo mellorou a precisión das súas cirurxías minimamente invasivas de columna vertebral grazas ao uso de neuronavegación 3D. En concreto, un equipo cirúrxico no que se combina as imaxes radiológicas en tempo real, a reconstrución 3D e a neuronavegación permite aos neurocirurxiáns do centro vigués mellorar a precisión nas súas intervencións de columna.

Este equipamento, adquirido dentro do acordo subscrito en 2021 con Medtronic para dotar aos hospitais Vithas coa tecnoloxía máis punteira, está especialmente indicado para guiar aos profesionais na colocación minimamente invasiva de parafusos, aumentando a precisión e a seguridade nas cirurxías e reducindo as posibles complicacións, segundo informou Vithas Vigo.

Dita tecnoloxía xa está en funcionamento dende o pasado mes de marzo en Vigo e utilízase de maneira xeneralizada en, practicamente, todas as cirurxías. “Supón un salto cualitativo para o paciente, que é o maior beneficiario da adquisición, ao aumentar a seguridade nas cirurxías de costas”, engadiu o centro hospitalario, que se converteu nun dos primeiros de España en pór en marcha este arco 3D intraoperatorio e a súa integración coa neuronavegación.

“Os problemas de columna son enfermidades moi frecuentes que están a sufrir un aumento progresivo na poboación. Aínda que tentamos evitalo, en ocasións débese fixar a columna vertebral debido á súa inestabilidade. A introdución dos parafusos nas vértebras require unha alta precisión e esta ferramenta ofrece maior seguridade aos pacientes”, subliñou Álvaro Martín Galego, neurocirurxán  do Hospital Vithas Vigo.

O sistema permite guiar, asistir, revisar e planificar procedementos cirúrxicos de columna. A realización deste está indicada para todo tipo de patoloxía de columna como hernias discais, lumbares, cervicais e dorsais, estenosis da canle raquídeo, deformidades e tumores de columna.