A actividade empresarial galega aumentou a súa capacidade para crear riqueza durante a pandemia, segundo o informe Ardán da Zona Franca de Vigo, que presentou na súa caseta da Feira Mindtech datos adiantados do devandito documento.
Será no mes de xullo cando salga á luz o ‘Informe Económico e de Competitividade das Empresas de Galicia’ aínda que este mércores o Consorcio avanzou que os resultados son “positivos”.
De feito, segundo recolle Zona Franca nun comunicado, a xeración de riqueza nas empresas galegas, medida a través do Valor Engadido Bruto, creceu en 2021 (último dato dispoñible) un 15% de media respecto ao ano anterior.
A directora da Cátedra Ardán, Belén Feijóo, explicou o traballo que supón a elaboración dos Indicadores Ardán, referentes da excelencia empresarial e exemplos a seguir por outras empresas. Segundo dixo, soamente un 6% das empresas analizadas alcanza os esixentes criterios destes indicadores.
Ademais, este ano Ardán creará un novo indicador, o de fortaleza financeira, que identifica as compañías con excelente desempeño na súa autonomía financeira, liquidez, rendibilidade e solvencia, respecto doutras empresas da súa mesmo sector.
Zona Franca tamén presentou en Mindtech a nova edición de ViaExterior, a aceleradora de internacionalización que o Consorcio pon en marcha cada ano e que en outubro de 2023 lanzará a súa sexta edición. Máis de 100 profesionais de diferentes empresas pasaron por este programa.
MINDTECH
Noutra orde de cousas, no contexto desta feira celebrouse este mércores a final do Mindtech Startup Event, unha competición de startups impulsada pola organización xunto coa Xunta de Galicia na que se busca ás empresas emerxentes coas ideas máis innovadoras que sexan capaces de transformar a industria 4.0 cunha solución tecnolóxica única.
Así, na categoría de Transformación e Dixitalización de Procesos Industriais resultou gañadora Xoia Extending Reality, desenvolvedores de Augemented Factory, un paquete de solucións de realidade aumentada.
Pola súa banda, na categoría de Eficiencia Enerxética e Redución do Impacto Ambiental a gañadora foi Enercraft, que deseña, desenvolve e fabrica dispositivos enerxéticos de apoio en terra para aeronaves.
No ámbito de Economía Circular na Industria e Sustentabilidade o premio foi para Velca, fabricante de vehículos urbanos 100% eléctricos con batería extraíble que se pode cargar en calquera enchufe doméstico.
