Un mozo, I.S.T. de 23 anos de idade, resultou ferido na madrugada do pasado martes en Vigo tras chocar contra un coche cando circulaba cuadriplicando a taxa de alcol legalmente permitida.
Tal como informou a Policía Local, os feitos ocorreron sobre as 01,40 horas na Avenida de Fragoso. Alí, un patinete impactara contra un turismo, resultando o condutor do vehículo de mobilidade persoal ferido.
Unha vez no lugar, o home manifestaba sufrir un golpe na cabeza como consecuencia da colisión. Ao mostrar síntomas de atoparse baixo os efectos do alcol, foi sometido ás probas pertinentes, dando un resultado positivo de 1,19 e 1,09 miligramos por litro, mentres que o condutor do turismo arroxou unha taxa de 0,0 mg/l.
Horas antes, sobre as 09,40 horas desa mañá, os axentes interceptaron na avenida Clara Campoamor ao condutor dun vehículo de transporte compartido que circulaba sen contrato previo ou folla de ruta, o cal está prohibido por lei. Ademais, carecía de autorización administrativa para conducir o automóbil, polo que se instruíron dilixencias por un suposto delito contra a seguridade viaria.
Tamén en Vigo, o pasado domingo a Policía Local e os Bombeiros tiveron que acudir ao Torreiro de Valladares, onde un coche comezou a arder. O propietario indicou que mentres circulaba empezou a ver fume, polo que aparcou nunha zona ampla sen casas preto para evitar que o incendio se propagase.
