O buque ‘Ártabro’, da empresa viguesa ACSM Shipping, atracou na mañá deste luns no Porto da cidade olívica tras finalizar a misión de procura, localización e inspección do pesqueiro galego ‘Villa de Pitanxo‘, naufragado en xaneiro de 2022 en augas de Terranova (Canadá).
Tras partir precisamente de Vigo o pasado 17 de maio, o barco volveu a navegar por augas da ría viguesa sobre as 12,00 horas, cando foi remolcado ata o antigo porto de granito, situado en Rande, Redondela.
O ‘Ártabro’ regresou a Vigo despois de que o Rov submarino que transportaba inspeccionase o pecio do Pitanxo, gravando imaxes dos restos do buque e das súas inmediacións no fondo do océano, sen que se atopase ningún corpo dos mariñeiros aínda desaparecidos. Esas imaxes servirán de probas para a investigación do naufraxio.
