O Tribunal Superior de Xustiza de Galicia (TSXG) desestimou un recurso de súplica presentado pola Autoridade Portuaria de Vigo e ratificou unha sentenza que condenaba ao organismo por vulnerar o dereito de liberdade sindical por “discriminar” a unha delegada da CIG nun proceso interno.

O alto tribunal galego rafica a nulidade dun nomeamento que, segundo a CIG, “fíxose a dedo” e tamén avala a correspondente indemnización a esta traballadora.

A sección sindical sinalou que esta resolución era “esperada”, xa que a cuestión “estaba ben clara”. “A Autoridade Portuaria, coa complicidade de UXT e CC.OO., sáltase sistematicamente o modelo de xestión por competencias co fin de vulnerar os dereitos das delegadas e delegados da CIG”, denuciou, e incidiu en que este “non é un caso illado”.

Por outra banda, criticaron que o Porto, con Jesús Vázquez Almuíña á fronte nese momento, recorrese a sentenza do xulgado do Social. Deste xeito, a indemnización incrementouse, porque o traballador que foi “mobilizado de maneira irregular” (cuxo nomeamento se anulou) segue no seu posto de xefe de servizo e percibindo a diferenza salarial que debería ser percibida pola delegada da CIG.

A CIG advertiu de que sería “unha irresponsabilidade” se o Porto volve recorrer, aínda que engadiu que non sería estraño porque “os mandatarios do PP deixan de lado a xestión dos recursos humanos, delegando as decisións nun secretario que adoita pensar que é amo e señor da Administración”.

Respecto diso, o sindicato denunciou que os dereitos dos delegados da CIG son “vulnerados continuamente”, e exércense “represalia” para tentar “intimidalos” e “limitar” a súa actividade.

Finalmente, a central afirmou que, “ante a gran cantidade de irregularidades que tiveron lugar na Autoridade Portuaria de Vigo nestes últimos anos”, non descarta “ir máis aló”, porque habería prácticas que “encaixan na definición da prevaricación administrativa”.