A Xunta de Galicia e a Universidade de Vigo (UVigo) presentaron este xoves un vídeo para concienciar sobre a función dos insectos polinizadores e a necesidade da súa preservación.

Titulado ‘A illa dos polinizadores’ e producido pola UVigo en colaboración co Goberno galego, foi elaborado a partir dun cómic co mesmo nome realizado por Luís Navarro, Iván Arós e Sophie Drescher.

Trátase dunha curtametraxe de animación realizado co apoio e o asesoramento do equipo Divulgar do departamento de Bioloxía da UVigo, integrado por Miriam Álvarez, entre outros, que ten como obxectivo dar a coñecer o papel que xogan os insectos polinizadores no medioambiente e concienciar sobre a importancia de conservalos.

Ademais da peza audiovisual, tamén foi presentada unha exposición itinerante co mesmo fin. As dúas iniciativas enmárcanse no proxecto LIFE insular do que forma parte a Comunidade galega e que traballa pola preservación do hábitat das illas atlánticas.