A xuíza de instrución 1 de Vigo decretou o ingreso en prisión provisional, comunicada e sen fianza para o home detido como presunto autor material do incendio que calcinou por completo un bus urbano na cidade, o pasado 30 de abril, segundo confirmaron fontes do Tribunal Superior de Xustiza de Galicia (TSXG).
As mesmas fontes indicaron que a segunda persoa detida, unha muller, parella do anterior e considerada o seu cómplice nestes feitos, quedou en liberdade. Ambos están investigados por un suposto delito de danos. A Policía Nacional da Comisaría de Vigo informou este mércores da detención destas dúas persoas.
A investigación determinou que o home foi o autor material do incendio que queimou por completo un bus da liña 4A, na noite do domingo 30 de abril, e tamén dun conato de incendio unhas horas antes, nun autocar da liña C3, á altura de Tomás Alonso. En ningún dos casos houbo feridos, aínda que si danos materiais. De feito, a empresa concesionaria do bus urbano de Vigo, Vitrasa, cifrou en máis de 340.000 o custo do vehículo que quedou totalmente calcinado.
MÁIS DANOS
Por outra banda, a empresa volveu a denunciar este mércores dous novos “ataques violentos” contra buses da súa frota. Así, un vehículo da liña 7 recibiu o impacto dunha pedra ao seu paso pola Estrada da Garrida sobre as 5,40 horas da mañá. Unha hora máis tarde, o condutor dun bus da liña C3, que se dispuña a reiniciar a marcha desde unha parada á altura da igrexa de Bouzas tras o seu descanso, detectou que unha das rodas do vehículo fora picada, polo que non puido retomar o servizo.
