Axentes da Policía Local de Vigo detiveron a un veciño da cidade, C.D.C., de 33 anos de idade, como presunto autor dun delito de violencia de xénero, tras ameazar á súa exparella na terraza dun local.

Segundo informaron fontes policiais, os feitos ocorreron na madrugada do pasado domingo, cando un particular chamou ao 092 para alertar de que un home estaba a ameazar a unha moza nunha terraza dun establecemento hostaleiro.

Unha vez no lugar, varias testemuñas informaron os axentes de que había dúas mulleres na terraza e que chegou un home que comezou a ameazar a unha delas de gravidade. A vítima, de 22 anos de idade, explicou aos funcionarios que se trataba da súa exparella, con quen finalizara a relación había poucos meses.

Segundo a súa versión, momentos antes estivera alí ameazándoa de gravidade “por unha cuestión de celos”, e a moza tivera que refuxiarse no interior do local.

O sospeitoso ausentouse, pero a Policía localizouno pouco despois no cruzamento das rúas Canceleiro e García Barbón, onde foi detido por un presunto delito de violencia de xénero.