A Confraría de N.P. Jesús do Silencio, Inmaculada Virxe da Amargura e Cristo da Fe, reunida este xoves en sesión de Cabildo, acordou por unanimidade cancelar o desfile procesional do Venres Santo da Inmaculada Virxe da Amargura.
Tal e como explica o presidente da Confraría, Guillermo Carballido Rodríguez, nun comunicado, a decisión, “dolorosa e histórica nos 78 anos de existencia” da confraría, vén motivada polos “gravísimos” feitos que tiveron lugar na Porta do Sol durante unha procesión cara a Santiago O Maior.
Denuncian violencia física, tamén “por parte de portadores dos pasos procesionais da Diocese cara a confrades desta confraría”.
“Iso non é máis que o culmen dunha imposición taxativa, unilateral e despectiva cara a esta institución, desde a Delegación Episcopal e os seus compoñentes, sen darnos a palabra en ningún momento, ninguneándonos en calquera toma de decisión”, alegan.
Aseguran ser “conscientes” da decisión que toman pero sinalan que, “ante todo”, deben “defender a honra da confraría, aos confrades e a súa historia”. “Unha Semana Santa é o traballo de 365 días, de moitas persoas que sacrifican, xa non o seu tempo persoal se non o que é máis importante, o seu tempo familiar“, conclúen.
