Axentes da Policía Local de Vigo detiveron a un home de 23 anos de idade, P.E.D.F., como presunto autor dun delito de lesións, tras agredir a outro mozo nunha zona de copas da cidade.

Os feitos ocorreron na madrugada do pasado sábado, cando unha patrulla se atopaba facendo labores de prevención e desaloxando a un grupo de persoas que estaban aglomeradas na primeira Travesía de Santiago de Vigo, causando ruído e molestias.

Cando estaban a realizar ese labor, os axentes foron requiridos por un mozo, que denunciou que outro mozo agredira a un amigo seu na rúa Churruca. A vítima relatou aos policías que outro home lle deu varias puñadas na boca e na mandíbula, e presentaba sangue nun beizo e un dente fracturado.

Os requirentes sinalaron á Policía quen era o sospeitoso que, ao decatarse da súa presenza, deuse á fuga por varias rúas desa zona. Finalmente foi interceptado e identificado. O sospeitoso recoñeceu a agresión, pero xustificouna para defenderse no transcurso dunha pelexa. Os policías detivérono por un suposto delito de lesións.