O alcalde de Vigo, Abel Caballero, volveu a denunciar este venres o “ataque” da Xunta á campaña do Nadal impulsada desde o Concello, tras recibir un requirimento sobre a instalación do mercadillo (Cíes Market) na Praza de Compostela, coñecida como a Alameda.
Nunha rolda de prensa, o rexedor olívico afirmou que Patrimonio se dirixiu ao Concello para facer un requirimento sobre a instalación deses postos na Alameda, tras unha denuncia do BNG, e asegurou que a administración autonómica traslada que debe ser Patrimonio o que autorice esa actividade. Todo iso, segundo Caballero, porque “queren parar o Nadal de Vigo”.
O alcalde asegurou que existe “unha alianza” entre BNG e PP para boicotear a campaña do Nadal viguesa, mesmo con denuncias nos xulgados “a través de intermediarios”, e asegurou que o Concello non necesita autorización de Patrimonio para a instalación do mercadillo porque “son actuacións efémeras en superficie”.
“Cal é o dano ao patrimonio?”, cuestionou, e lembrou que o Cíes Market instálase en Nadal desde hai anos e que non se produciu “nin un só dano” ao patrimonio. “Isto é pura política, e detrás están os candidatos do BNG e do PP, e detrás, Ana Pontón e Rueda”, concluíu.
O alcalde, que lembrou que se instalan mercadillos similares en prazas históricas “de toda Europa”, proclamou que nacionalistas e populares “non soportan” que Vigo consolidase unha campaña do Nadal que é “referente en todo o planeta”.
RESPOSTA DA XUNTA
Pola súa banda, a Xunta de Galicia explicou que o pasado 1 de decembro de 2022 recibiu na Dirección Xeral de Patrimonio a denuncia do BNG e, “como marcan os procedementos”, informou o Concello das dilixencias informativas de apertura de expediente sancionador.
Os días 27 e 29 de decembro, o Concello remitiu as súas alegacións, “sinalando que se trataba de obras menores”. O 14 de marzo o Servizo de Patrimonio Cultural emitiu informe técnico, e días despois enviou unha copia ao Concello e reclamoulle varios documentos (proxecto técnico, condicións para o uso do espazo, limitación de aforamento, actividades, etc., medios de vixilancia ou informe da arqueóloga municipal, entre outros).
A Xunta precisou que, a día de hoxe, o expediente aínda non está resolto, aínda que subliñou que, “como calquera outra administración pública”, debe ser “respectuosa co marco normativo para conservar o patrimonio de todos os cidadáns”.
