A empresa Vitrasa, concesionaria do servizo de bus urbano en Vigo, denunciou danos en dous buses na mañá deste xoves, e na véspera do tres xornadas de folga convocadas polo comité para este venres para reclamar melloras salariais e laborais.
Segundo informou a compañía nun comunicado, o primeiro “ataque” rexistrouse sobre as 5,40 horas, contra un autocar que se estaba incorporando ao servizo na liña 6, ao seu paso pola estrada de Clara Campoamor. O bus recibiu o impacto de pedra, que provocou a rotura dunha das lúas, próximas ao condutor, pero non houbo danos persoais.
Unha hora máis tarde, outro bus que xa comezara a súa ruta, a da liña 17, recibiu outro impacto contra unha das lúas, ao seu paso polo Freixo. O condutor tampouco sufriu danos nesa ocasión, nin había viaxeiros a bordo nese momento.
“Por sorte, non houbo feridos e o persoal que facía o servizo neses buses non sufriu ningún dano”, sinalou Vitrasa, que advertiu de que “este tipo de ataques pon en risco non só a seguridade dos viaxeiros, senón tamén a dos compañeiros e compañeiras que realizan o servizo”.
A empresa afirmou que este tipo de “actos vandálicos” non fan máis que “elevar a tensión da situación a un día de iniciar a folga” convocada polos sindicatos para os días 31 de marzo, 1 e 2 de abril, coincidindo co fin de semana ‘grande’ da celebración da Reconquista en Vigo, e “a escasas horas de manter unha reunión entre empresa e comité”.
A concesionaria volveu a reiterar que a folga é “desproporcionada” e insistiu en que os traballadores de Vitrasa contan cun convenio colectivo que “é o mellor do sector en toda Galicia”, cun soldo “un 37 % máis alto que calquera outro compañeiro do sector na provincia”.
Finalmente, lamentou que o comité “leva case 5 meses prolongando esta situación de paros que prexudican amplamente á cidadanía, ao persoal e á empresa”, e insistiu en que a compañía se atopa nunha situación de “perda de viaxeiros” derivada da pandemia do Covid e de perdas económicas “de varios millóns de euros”, polo que as demandas dos sindicatos son “ilóxicas” e “insolidarias”.
REUNIÓN
Con respecto á reunión entre empresa e representantes dos traballadores, o comité informou de que a dirección “se presentou sen ningunha proposta sobre os puntos que se expuxeron hai máis de 15 días”.
Segundo os sindicatos, “con esta actitude” Vitrasa “volve demostrar que non ten ningún interese en solucionar o conflito, que afecta gravemente á cidadanía”.
Así as cousas, o comité confirmou que mantén a convocatoria de folga para o tres próximos días e, tras pedir desculpas aos cidadáns polas consecuencias do paro, fixo un chamamento a participar na manifestación convocada para as 19,30 horas deste venres, con saída do cruzamento dos Choróns e chegada na Praza de Compostela.
