Uns 1.800 alumnos de entre cuarto e sexto de Educación primaria de 28 centros escolares de Vigo e a súa comarca asistirán a cinco representacións previstas da obra de teatro ‘Cíclope’, que forma parte do programa de educación financeira que desenvolven Abanca e Afundación ao longo do curso.

Tal como indicou a entidade nun comunicado, este martes deron comezo as funcións no Teatro Afundación, que continuarán mércores e xoves. A produción tamén se porá en escena noutras seis localidades das catro provincias galegas ata o próximo 24 de marzo. En total, 6.450 nenos gozarán da actividade didáctica.

‘Cíclope’ é a cuarta obra de teatro do programa do banco e de obra social, despois de ‘Labirinto’, ‘Troia’ e ‘Dos contos ás contas’. Nesta ocasión, a montaxe utiliza os mitos clásicos para concienciar aos estudantes de 10 a 12 anos da importancia de realizar unha boa xestión das finanzas persoais.