O Instituto Feiral de Vigo (Ifevi) acollerá entre os próximos 8 e 12 de marzo a 32º edición do Salón do automóbil e a motocicleta da cidade olívica, que reunirá aos principais concesionarios da comarca representando a unhas 60 marcas.
A exposición contará cuns 20.000 metros cadrados con 35 firmas de coches e unhas 25 de motocicletas, converténdose nun evento “imprescindible” para todos aqueles que estean a pensar en renovar o seu vehículo, segundo aseguran os organizadores nun comunicado.
“Cun mercado cada vez máis variado, resulta fundamental contar cun bo asesoramento á hora de cambiar de coche ou moto. No Salón do automóbil e a motocicleta de Vigo os visitantes terán á súa disposición unha rede de profesionais que axudarán aos indecisos a resolver as súas dúbidas sobre cal é o modelo que máis lles convén”, engadiron. O Salón contará cunha ampla gama de oferta de entretemento, como unha caseta onde os asistentes poderán simular que están subidos a un coche de Fórmula 1.