A Deputación de Pontevedra investiu 69 millóns de euros, desde 2016, en sete municipios da comarca de Vigo (sen contar a urbe olívica), onde se realizaron case 700 obras, unhas 2.400 actividades socioculturais e xeráronse máis dun milleiro de empregos.

Este é o balance presentado este martes pola presidenta da institución provincial, Carmela Silva, nun almorzo con medios informativos, no que debullou os investimentos e actuacións en Redondela (por 14,4 millóns de euros), Fornelos de Montes (6,2 millóns), Mos (11,7 millóns), O Porriño (13,8 millóns), Pazos de Borbén (4,9 millóns), Salceda de Caselas (9,5 millóns) e Soutomaior (6,7 millóns).

Segundo subliñou a presidenta da Deputación, eses 69 millóns de euros supoñen “un 87 % máis do que investía o PP” nestes municipios. Respecto diso, reiterou que o goberno provincial que ela preside impulsou “unha transformación como nunca se viu”, con investimentos “estables”, aprobadas “con criterios obxectivos”, e independentemente da cor política dos gobernos municipais.

Carmela Silva repasou as principais actuacións financiadas pola Deputación nos municipios da comarca de Vigo, e fixo fincapé na rehabilitación da contorna do Castelo de Soutomaior e a súa musealización, cun investimento de 1,8 millóns, aos que se sumarán novos fondos para facer “un cambio radical na súa iluminación”.

Por outra banda, reivindicou o esforzo da Deputación para modernizar todos os municipios a través do Plan Concellos, con actuacións “tranformadoras”; así como outros plans extraordinarios para destinar fondos aos concellos e permitir, entre outras actuacións, a reforma da biblioteca de Mos.

A presidenta da Deputación referiuse tamén ás melloras na rede provincial de estradas, a actuacións no ámbito turístico e cultural, apoio á administración electrónica, iniciativas de fomento de emprego e emprendimiento, do ámbito dos deportes, da transición ecolóxica ou da cohesión social.