Axentes da Comisaría da Policía Nacional de Vigo-Redondela detiveron a dúas mulleres pertencentes a un grupo organizado criminal, de carácter itinerante, altamente especializado en roubos con forza en domicilios.

A investigación iniciouse hai uns meses, nos que se mantiveron activos os operativos de prevención de roubos en vivendas, ante a presenza de grupos especializados e itinerantes que se desprazaron por toda a xeografía española. Así, as forzas e corpos de seguridade foron alertadas cando se detectaron roubos na súa zona de actuación que puidesen coincidir polo modus operandi con estes grupos.

Ás dúas mulleres, unha delas cunha reclamación xudicial en vigor, intervénselles un vehículo, luvas, teléfonos móbiles e 1.300 euros en efectivo, ademais de ferramentas e utensilios (desaparafusadores, chaves inglesa, ganzúas,…), susceptibles de ser utilizados para cometer este tipo de delitos.

O modus operandi destes grupos consiste en forzar as fechaduras, fractura de bombín e apalancar as portas, empregando forza.

A investigación, que continúa aberta, e non se descartan novas detencións, permitiu o esclarecemento de cinco roubos en domicilio cometidos en Vigo, sete en Valladolid e cinco en Salamanca.

A Policía Nacional destaca que a investigación e o operativo policial levado a cabo “pon de manifesto a capacidade de intercambio de información e eficacia das distintas canles de cooperación policial a nivel nacional e internacional” á hora de combater o crime organizado.