Baiona será no mes de setembro a capital da vela coa organización do mundial da clase J-80, que recalará en Galicia por primeira vez.
Este venres tivo lugar a presentación na Feira Internacional de Turismo (Fitur), que contou coa participación do vicepresidente segundo da Xunta, Diego Calvo, e a directora de Turismo de Galicia, Nava Castro.
O número tres do Goberno galego destacou a oportunidade desde o punto de vista turístico que representa para a comunidade esta cita, que se desenvolverá entre o 18 e o 24 de setembro.
Segundo recolle un comunicado, Calvo puxo o acento no binomio entre turismo e deporte, algo que, coa organización de citas de “primeiro nivel”, permiten “incrementar a presenza internacional da marca Galicia”.
Así, agradeceu o traballo do Monte Real Club de Iates de Baiona, promotores de traer a Galicia este mundial para barcos de vela de oito metros.
