O xulgado do Penal 3 de Vigo acollerá este luns e este martes unha vista contra un empresario de Baiona e o seu fillo, donos da histórica discoteca-pub ‘Villa Rosa’, acusados dun delito contra o medio ambiente e un delito de lesións, polos ruídos que xeraba a actividade do local e os prexuízos causados a un matrimonio que vivía nas inmediacións.
A vista estivo fixada para abril e para xullo pasados pero, por diversas circunstancias, foi suspendida, e finalmente sinalada para os días 4 e 5 de outubro.
Segundo se recolle no escrito de acusación da Fiscalía, “polo menos desde 2014” esta discoteca xeraba ruídos que excedían os límites legais e, a pesar das numerosas denuncias, mantivo a súa actividade. Así, as medicións realizadas entre 2014 e 2017 no exterior do local arroxaron resultados de máis de 70 decibeis (cando o máximo permitido eran 50) e as realizadas na vivenda dos denunciantes superaron con fartura os 40 decibeis (cando o máximo eran 30).
O local foi denunciado e o Concello de Baiona ordenou a suspensión da actividade e incoou expediente sancionador en 2015 polos ruídos, e tamén pola realización de certas obras sen licenza.
Pero os apercibimentos non deron resultado e, de feito, o propio consistorio foi instado os tribunais a executar esa suspensión de actividade. Aínda que se precintou a discoteca, posteriormente reabriu tras emendarse as deficiencias detectadas.
PREXUDICADOS
Un matrimonio que vivía preto do establecemento iniciou unha batalla legal polos ruídos que tiña que soportar e que lles levaron mesmo a trasladar ás súas fillas menores á casa doutros familiares cada vez que abría pola noite a ‘Villa Rosa’.
Ao longo de catro anos (acabáronse cambiando de domicilio en 2018) tiveron que soportar niveis de contaminación acústica que lles impedían descansar e que orixinaron un trastorno adaptativo asociado a “unha situación vital estresante”, segundo a Fiscalía. Así, padeceron insomnio, ansiedade, trastornos somáticos, etc., e quedoulles como secuela un trastorno neurótico.
DELITOS E PENAS
Por estes feitos, o ministerio público acusa aos procesados dun delito contra o medio ambiente e un delito de lesións, e pide para cada un deles 4 anos de prisión e o pago dunha multa de 84.000 euros.
Ademais, pide que indemnicen a cada un dos prexudicados en 39.000 euros, e paguen os gastos médicos nos que incorreron neses catro anos. Tamén solicita 4 anos de inhabilitación para exercer profesión no ámbito da hostalaría.
Por outra banda, para a sociedade creada por pai e fillo e dona do local a Fiscalía pide o abono dunha multa de 360.000 euros e o peche definitivo.
