Os servizos de emerxencia localizaron este domingo o corpo sen vida do pescador desaparecido desde a noite do venres na zona de Cabo Udra, no concello de Bueu.

Segundo informou o 112 Galicia, durante a mañá deste domingo unha persoa da contorna do desaparecido atopouno sen vida nas proximidades de Punta Chenla.

A procura realizouse por terra, mar e aire, coa participación de medios de Salvamento Marítimo, do Servizo de Gardacostas de Galicia, Garda Civil, Policía Local e Protección Civil.

A alerta da desaparición foi recibida na tarde deste sábado por parte da Policía Local. Foi a parella da vítima a que comunicou ao corpo de seguridade a falta do home, que saíra de casa sobre as 21,00 horas do venres para pescar na Punta de Cabo Udra.