Xunta e Porto de Vigo, entidades que controla o PP, volveron este martes a atacar ao concello tras o accidente no último concerto do Marisquiño. O vicepresidente da Xunta de Galicia, Alfonso Rueda (PP), criticou este martes ao alcalde de Vigo, o socialista Abel Caballero, polas súas declaracións.

“Creo que pornos a discutir sobre quen era o titular dos terreos, como esta facendo o alcalde de Vigo, é desviar a atención do fundamental, que é se se podía ou non autorizar un evento como o que tivo lugar o domingo pola noite na zona onde tivo lugar”, dixo nunha entrevista na SER.

Neste sentido, indicou que é o Concello o que “podía dicir que non se celebrase a actividade e dixo que si”, ao conceder a licenza aos organizadores do evento. Por tanto, cre que o importante é saber se o Consistorio fixo as comprobacións necesarias no lugar para concluír que “para os miles de persoas que se prevé” que acudan ao festival, “esta actividade é segura neste lugar”.

Pola súa banda, o presidente da Autoridade Portuaria de Vigo, Enrique López Veiga –tamén ex conselleiro do PP–, insistiu este martes en que a inspección da zona do porto que se derrubou a madrugada do luns correspondía ao organizador e ao Concello de Vigo.

“Creo que o importante é investigar o que pasou e repartir responsabilidades. É evidente que tamén a teñen os propios organizadores, o único que fai o porto é pór o terreo, quen ten que inspeccionar se as zonas son aptas para o acto é tanto o organizador como as autoridades municipais”, dixo nunha entrevista en Onda Cero.