Catro membros dunha familia de Redondela, dos que dous son menores de idade, precisaron asistencia médica ao sufrir unha intoxicación debida á acumulación de gas no interior da súa vivenda. Un deles foi trasladado ao Hospital Álvaro Cunqueiro de Vigo.
Ocorreu na mañá deste luns nunha residencia da rúa do Espírito Santo e foron os profesionais sanitarios os que deron o aviso ao 112 Galicia. E é que os propios ocupantes da casa solicitaran asistencia médica tras presentar síntomas compatibles cunha intoxicación.
Seguidamente, os xestores do 112 puxeron os feitos en coñecemento dos bombeiros de Redondela, que retiraron unha bombona de butano do interior e procederon a ventilar a vivenda ata comprobar que as medicións de gas eran negativas. No entanto, pasouse o aviso igualmente á empresa subministradora, así como á Policía Nacional e á Local.
Un dos membros da familia foi trasladado ao Hospital Álvaro Cunqueiro polo equipo de urxencias médicas, mentres que os tres restantes acudiron a este mesmo centro sanitario polos seus propios medios.
