Un profesor de danza enfróntase a 5 anos de prisión como suposto autor dun delito de abuso sexual contra unha menor, e será xulgado entre este luns e o mércores na sección quinta da Audiencia Provincial de Pontevedra, con sede en Vigo.

A Fiscalía sinalou, no seu escrito de acusación, que este home, director e profesor dun club de danza, convenceu a unha das súas alumnas, de 15 anos de idade, para que acudise ao seu domicilio a recibir unhas clases especiais para “mellorar a súa expresividade”.

O acusado advertiulle de que esas clases se impartirían por parellas e que debía gardar unha reserva absoluta, sen informar o resto dos seus compañeiros nin á súa familia. Así, as clases comezaron o último luns de outubro de 2018, e á primeira sesión a menor acudiu cun compañeiro. Nesa ocasión, o acusado mostroulles uns vídeos de baile e sobre a transmisión das emocións a través da expresión facial.

O 5 de novembro, a vítima acudiu a soa a esas clases particulares porque o seu compañeiro tiña unha cita médica. O profesor, segundo sinala o ministerio público, pediulle que se tombase e se relaxara, mentres lle facía unha masaxe co puño pechado pola zona da pube.

Unha semana despois, a menor volveu ao domicilio do seu profesor e volveu ir soa, porque o seu compañeiro estaba nun campionato. O acusado comezou esa clase facendo preguntas á nena sobre a súa vida sexual.

A continuación, pediulle que  sacase o suxeitador porque este “a encorsetaba” e, coa escusa de facer varios exercicios, tocoulle o corpo por encima e por baixo da roupa, a pesar de que a menor lle dixo que estaba “nerviosa e incómoda”. A clase concluíu tras pedirlle o profesor que lle axudase a elaborar unhas facturas, “dicíndoo expresamente que se mantivese sen suxeitador”.

PENAS

Por estes feitos, a Fiscalía atribúe ao acusado un delito de abuso sexual, e pide que sexa condenado a 5 anos de prisión, e que o inhabiliten para exercer toda profesión ou oficio relacionado coa docencia por un período de 8 anos.

Así mesmo, reclama que se lle impoña a prohibición de achegarse ou comunicarse coa vítima durante 8 anos, e que indemnice á prexudicada en 6.000 euros polos danos morais causados.