Axentes da Garda Civil, en coordinación coa Policía Local do Porriño, detiveron a un veciño desta localidade, de 33 anos de idade, como presunto autor dun delito de tráfico de drogas, e ao que se lle interviñeron unhas 60 plantas de marihuana, que cultivaba na súa vivenda.
Segundo informaron fontes do Instituto Armado, a investigación iniciouse hai uns meses, tras coñecerse que a vivenda do sospeitoso, na parroquia de Pontellas, podería ser un punto de venda de droga ‘polo miúdo’.
Tras confirmar as súas sospeitas, e interceptar a varios compradores de estupefacientes que saían dese domicilio, os axentes detiveron á persoa que residía no inmoble. No rexistro realizado, a Garda Civil descubriu unha plantación ‘indoor’ de marihuana, con 60 plantas, e dotada de sofisticados sistemas eléctricos e de ventilación, con lámpadas de calor, temporizadores e armarios de secado.
Así mesmo, interviñéronse varias bolsas con pequenas cantidades de distintas drogas, dúas armas indocumentadas de aire comprimido, dúas básculas de precisión e 200 euros en metálico.
O detido, así como o material incautado, foron postos a disposición do xulgado de instrución de garda no Porriño.
