Os Bombeiros de Baixo Miño axudaron a un home que tiña dificultades para saír do río no municipio de Salvaterra de Miño á primeira hora da mañá deste martes.
Segundo informou o 112, efectivos de salvamento explicaron que o mozo, de nacionalidade portuguesa, “botouse ao río desde a ponte que comunica Galicia e Portugal e baixou uns 200 metros pola canle ata que puido resgardarse nunha zona illada”.
Alí chegou un bombeiro para axudarlle a saír do río e facilitar a asistencia médica, xa que presentaba síntomas de hipotermia, indicaron as mesmas fontes. O rescate realizouse despois de recibir o 112 Galicia a chamada de alerta dunha persoa particular que escoitaba os berros de auxilio do mozo.
Eran sobre as 8,00 horas e, a partir de aí, activouse un operativo no que participaron os Bombeiros de Baixo Miño, axentes da Garda Civil e Urxencias Sanitarias de Galicia-061.
Tamén foi informado o persoal da Comandancia Naval do Miño, así como os Bombeiros-GES de Ponteareas por se fose necesaria a súa intervención.
