Efectivos dos corpos e forzas de seguridade de Galicia e Portugal seguen buscando a un dos participantes no Tríatlon da Amizade, unha proba que se celebrou ao longo deste domingo entre Tomiño e Vilanova de Cerveira, en Portugal, e no que había participantes dos dous lados da fronteira.

As primeiras informacións que chegaron a Xornal de Vigo apuntaban que se trataba dunha muller, pero logo confirmouse que se trataba dun home de 23 anos de Portugal. O rapaz non chegou á meta tras a proba de natación, o que acendeu todas as alarmas.

Tras comprobar que non aparecía, os organizadores da proba decidiron suspender a competición e iniciar a súa busca. Foi entón cando se activou un protocolo de colaboración entre efectivos de salvamento, emerxencias e forzas de seguridade de Galicia e Portugal para dar con el.

Segundo participantes na proba consultados por XdV, o home non levaba traxe de neopreno, o que tería impedido que afogara. Con todo, non se sabe polo momento, os motivos ou razóns que provocaron o accidente. Estas mesmas fontes comentan que durante a competición non foron conscientes do que estaba acontencendo, aínda que persoas que asistían como público notaron como había un dos participantes “que parecía que afogaba”.

PROBA RECOÑECIDA

O Tríatlon da Amizade é unha proba que transcorre en territorio galego e portugués e que leva varias edicións celebrándose. Ten lugar entre as localidades de Goián, en Tomiño, e Vilanova de Cerveira. Este ano había tres modalidades; BBT Menores, que comezou ás 11.15 horas, Proba masculina e estafetas, ás 15.30 e a modalidade feminina, ás 15.35.

Para as probas de adulto consiste nun primeiro sector 150 metros a nado, continuando con 20 quilómetros de proba en bicicleta e finalizando coa carreira a pé de 5 quilómetros