Unha muller de 90 anos de idade, J.F.P., foi trasladada en helicóptero ao Hospital Álvaro Cunqueiro (HAC) de Vigo, despois de ser rescatada do mar e reanimada na praia de Vilariño, na parroquia de Aldán, en Cangas.
Segundo informaron fontes do 112 Galicia e do 061, os feitos tiveron lugar sobre as 15,30 horas, cando un particular alertou a emerxencias pola presenza do corpo dunha muller que flotaba na auga, cara ao final da praia.
Un particular que estaba no areal lanzouse ao mar e logrou rescatar o corpo, mentres que foron mobilizados efectivos de Policía Local, Garda Civil, Protección Civil, Salvamento Marítimo, Gardacostas, e 061.
Os sanitarios lograron reanimar á muller, que foi evacuada inmediatamente polo helicóptero do 061 (que ten base en Santiago) ao Hospital Álvaro Cunqueiro da cidade olívica.
