Un matrimonio e o seu fillo, dedicados á explotación de cafetarías en varios institutos de Vigo e a súa área, e acusados de defraudar máis de 164.000 euros nas cotizacións á Seguridade Social, aceptaron a pena dun ano de cárcere e multa de 90.000 euros nunha vista de conformidade celebrada este mércores na sección quinta da Audiencia Provincial de Pontevedra.

Os procesados recoñeceron os feitos e a Fiscalía rebaixou a súa petición de cárcere, de tres anos e medio a un ano de prisión, ademais do pago dunha multa de 90.000 euros. O tres acusados terán que indemnizar á Seguridade Social nos 164.516,45 euros defraudados, máis intereses, e non poderán acceder a subvencións ou beneficios fiscais durante 6 anos.

A pena de ingreso en prisión quedou suspendida durante 3 anos, xa que ningún ten antecedentes penais, e coa condición de que non delincan durante ese tempo e que paguen a indemnización á Seguridade Social.

Segundo o relato de feitos da Fiscalía, os procesados desenvolveron entre 2014 e 2022 unha actividade empresarial no ámbito da explotación de cafetarías en distintos institutos de Vigo, Redondela e Ponteareas, en réxime de concesión outorgada pola Consellería de Cultura, Educación e Universidade da Xunta.

O matrimonio e o seu fillo utilizaron sucesivamente varias empresas familiares coas que operaban en períodos temporais co fin de eludir o pago das cotas á Seguridade Social e evitar que as débedas acumuladas impedisen acceder a novas adxudicacións públicas.

O pai, administrador do grupo empresarial, coa colaboración da súa esposa e do seu fillo, levou a cabo a actividade canalizándoa a través das sociedades Pazmella S.L., Reprepan S.L., Libroverde S.L. e, posteriormente, mediante unha empresa unipersonal administrada polo fillo.

Este sistema permitiu que as distintas entidades continuasen obtendo concesións para xestionar as cafetarías dos institutos IES O Castro e IES A Guía en Vigo, IES Chapela en Redondela e IES Barral en Ponteareas durante os cursos comprendidos entre 2018 e 2022. Posteriormente, adxudicouse este servizo novamente a través da razón social nos cursos 2020-2021 e 2021-2022. O importe das cotas non pagas á Seguridade Social foi de 164.516,45 euros, débedas acumuladas polas empresas da familia.

TRÁFICO DE DROGAS

Por outra banda, na xornada deste mércores, tamén se celebraron varias vistas de conformidade en procedementos por tráfico de drogas. Así, un mozo aceptou 3 anos de prisión tras sorprendido nun operativo policial nun bar de Redondela con varias bolsitas de cannabas e cocaína. A execución da pena (á que se aplica a atenuante de drogadicción) queda suspendida durante 4 anos, a condición de que se manteña en tratamento de desintoxicación e que non delinca nese tempo.

Igualmente, unha muller aceptou 2 anos de cárcere pola venda dunha papelina de cocaína (a pena queda suspendida durante 2 anos a condición de non delinquir) e outro mozo aceptou 3 anos de cárcere polo mesmo delito, tamén con suspensión da pena. Outro acusado de tráfico de drogas, sorprendido ao volante do seu coche levando cocaína, MDM, cannabis e ketamina, aceptou 3 anos de prisión.

Outro dos xuízos por tráfico de drogas quedou á espera de señalamiento, xa que non foi posible un acordo entre as partes. Trátase dun procedemento contra tres acusados de traficar con cocaína, heroína e cannabis, para quen se piden penas que oscilan entre os 4 anos e 3 meses e os 5 anos e 3 meses de prisión.

DETENCIÓN ILEGAL E AGRESIÓNS SEXUAIS

Este mércores tamén estaba sinalado un xuízo contra un mozo acusado de haber extorsionado a outro porque, supostamente, roubáralle diñeiro na súa casa. Segundo a Fiscalía, o acusado quedou coa vítima e, ameazándoo cunha navalla, obrigouno a conducir a unha zona apartada, onde lle picou coa arma varias veces e fotografouno espido. A falta de acordo para chegar a unha conformidade fixo que a vista quede pendente de señalamiento para a súa celebración. O ministerio público pide condenas que suman 8 anos de cárcere.

Tampouco houbo acordo no caso dun home de avanzada idade, acusado de agresión sexual continuada a unha nena menor de 16 anos. O xuízo tamén quedou pendente de señalamiento, e a Fiscalía pide que sexa condenado a 5 anos de prisión. A vista contra outro acusado por agresión sexual, por facer supostamente tocamentos a unha nena nun parque de Vigo, quedou aprazada ata o 23 de setembro, pola imposibilidade do procesado para comparecer este mércores.