Dous axentes da Policía Nacional salvaron a vida dun neno de 3 anos que se desmaiou no barrio de Lavadores de Vigo, se golpeou na cabeza e quedou sen respiración. Segundo informa ese corpo de seguridade, unha muller chamou o 091 para solicitar unha ambulancia urxente, xa que “estaba a perder o seu fillo”. Segundo explicaba a nai na chamada, o menor desmaiárase e golpeárase na cabeza, e permanecía inconsciente no chan con dificultade para respirar.

Unha patrulla do Grupo de Atención ao Cidadán que se atopaba na zona acudiu de inmediato ao domicilio e comprobou que o menor presentaba cianose (a pel de cor violácea por falta de osíxeno) porque non era capaz de respirar. Mentres a ambulancia medicalizada se desprazaba ao punto, os axentes observaron que o neno deixou de respirar e iniciaron as manobras de reanimación cardiopulmonar, logrando finalmente que o menor vomitase, rompese a chorar e recuperase a respiración. Minutos despois, os sanitarios fixéronse cargo da súa estabilización.

Debido á urxencia e á elevada densidade de tráfico nese momento, o persoal sanitario solicitou apoio policial para axilizar o traslado ao hospital. Os axentes coordinaron varios cortes de tráfico que foron executados por distintos indicativos policiais. “Esta canalización do tráfico resultou determinante para garantir a rápida chegada do menor ao Hospital Álvaro Cunqueiro de Vigo, onde, segundo a información facilitada pola familia, o neno se recuperou favorablemente”, engade a Policía.