A Garda Civil denunciou unha vertedura de hidrocarburo orixinada no porto deportivo de Baiona que acabou na rede de saneamento municipal, causando un forte cheiro a combustible na localidade.
A investigación, levada a cabo pola patrulla do Seprona de Vigo, confirmou que o depósito de almacenamento de gasolina do porto sufrira filtracións de auga salgada. O persoal do porto, nunha xestión indebida, verteu a mestura de carburante contaminado a unha fosa de decantación que se comunica directamente co saneamento público.
O Concello de Baiona publicara un bando municipal no que advertía da presenza de cheiros e a posibilidade de “gases perigosos e inflamables” na rede debido á detección do combustible. A Garda Civil denunciou os feitos ante o Concello de Baiona, a Consellería de Medio Ambiente e Portos de Galicia.
