Axentes da Policía Nacional da Comisaría de Vigo desarticularon un grupo criminal dedicado ao tráfico de drogas e detiveron a tres persoas en Vigo e Gondomar. A investigación, iniciada pola Unidade de Drogas e Crime Organizado (UDYCO) en abril, centrouse inicialmente nun punto de venda de drogas no barrio das Travesas, onde un home distribuía estupefacientes desde a habitación dun hostal.

As pescudas levaron ao seu provedor, un home que operaba desde a súa vivenda unifamiliar en Gondomar e fornecía cocaína, heroína e marihuana a traficantes de Vigo e comarca. Este xoves leváronse a cabo rexistros simultáneos. No hostal, os axentes detiveron ao primeiro sospeitoso e interviñeron 3 gramos de heroína, 40 gramos de haxix e útiles para a venda por dose.

Ao mesmo tempo, a Unidade de Prevención e Reacción (UPR) realizou unha entrada na vivenda de Gondomar, utilizando drones para o recoñecemento do terreo rural. Durante o operativo, o provedor lanzou pola xanela un paquete que contiña medio quilo de heroína. El e a súa parella, que tentou obstaculizar o labor policial, foron detidos.

No rexistro de Gondomar incautáronse, ademais da heroína, 20 gramos de marihuana, uns 4.000 euros en efectivo, cafeína para o corte, básculas de precisión e diversa munición e un machete. Os tres detidos foron postos a disposición do Xulgado de Instrución número 8 de Vigo, que decretou a súa liberdade con cargos coa obriga de comparecer dúas veces ao mes, xa que a Fiscalía non interesou a prisión provisional.